शेतीच्या वादातून भावांभावात व्हायचे भांडण

चंद्रपूर : शेत जमिन हिस्साच्या कारणावरून दोन्ही भावात होत असलेले भांडण टोकाला गेल्याने लहान भावाने अपंग असलेल्या थोरल्या भावाची दगडाने ठेचून हत्या केल्याची खळबळजणक घटना काल बुधवारी (16 फेब्रुवारी 2022) ला नागभीड तालुक्यातील तळोधी (बा.) येथे दुपारच्या सुमारास घडली. राजेश्वर भिवाजी जुमडे (65) असे मृतकाचे नाव आहे. तर बंडू भिवाजी जुमडे असे आरोपी भावाचे नाव असून पोलिसांनी त्याला अटक केली आहे.

पोलिस सुत्रानुसार, नागभीड तालुक्यातील तळोधी (बा.) येथील मृतक राजेश्वर जुमडे व बंडू भिवाजी जुमडे हे दोन्ही भाऊ भट्टी वार्ड क्रमांक 4 येथील रहिवासी आहेत. आईच्या मृत्यूनंतर दोन्ही भावांमध्ये शेतजमिनीच्या हिस्यावावरून वारंवार भांडण होत होते. या कारणामुळे भावांभावांमध्ये वितुष्ठ निर्माण झाले होते. काल दुपारच्या सुमारास झेंडा चौकात लहान भाऊ बंडू जुमडे हा नशापाणी करून आला. व त्याने अपंग थोरला राजेश्वर जुमडे यावेशी शेतजमिनीच्या हिस्यातकवरून भांडण करून लागला. दोघांमध्ये भांडण झाल्यानंतर थोरला घरी जाण्यासाठी निघाला असता लहान्याने त्याला लाथाबुक्यांनी मारहाण करण्यास सुरूवात केली. थोरला हा अपंग असल्याने त्यांने त्याचा प्रतिकार केला नाही. त्यामुळे लाथाबुक्याने मारहाण केल्यांनतर तो बेशुध्द पडला. तो एवढ्यावरच थांबला नाही. त्याने बेशुध्दावस्थेत पडलेल्या राजेश्वरचा दगडाने डोका ठेचून काढला. त्यामुळे तो जागीच गतप्राण झाला. भर चौकात ही घडल्याने प्रचंड भितीमय वातावरण निर्माण झाले होते.


त्यानंतर तब्ब्ल दोन तास झेंडा चौकात मृतदेह पडून होता. सदर घटना घरच्यांना माहित झाल्यानंतर मुलाने चौकात येऊन बघितले असता मृतदेह चौकात पडून होता. त्यानंतर लगेच पोलिसांनी माहिती दिली. आरोपी बंडू हा नशापाणी करून असल्याने त्याने हत्येनंतर हैदोस माजविला होता. चौकातील हत्येची माहिती कुणी पोलिसांना दिल्यास त्यांना सोडणार नाही असा दम देऊन चांगलीच दहशत निर्माण केली होती. काही वेळानंतर पोलिसांनी घटनास्थळी येऊन मृतेदह ताब्यात घेतला तर आरोपी बंडू जुमडे याला अटक केली. मृतकाचे प्रश्चात पत्नी 3 मुली, 1 मलगा असा परिवार आहे. शेतीच्या वादातून भावाभावात वितुष्ठ निर्माण झाल्याने निरपराध एका अपंग भावाला जिवास मुकावे लागले आहे. परिवार एका कर्त्यापासून पोरका झाला आहे.